Ӄорӷ

Ӄорӷ (шӧль. ӄорӄы; сӱссэ. квэрга; тюй. куэрх, уарсуурм; пай. куарга́) — варӷ, тӓну́ҳэдэл маҗӧ́ӷэл ху́руп. Чаптэ́т манҗэ́ ӄуп ай ӄорӷ уго́т не́ӷэнд э̄җеҳа́ӷ. Ӄорӷ - оӄӄэрни̇̄ ӄоштэӷэдэл, орҳу́л ху́руп, ӄорӷ ӄӯнан тӓ́нэҳе о́ӄӄэрта̄рэк э̄я. Ӄорӷ ме́нэрэл тӯбэӷэт, ме́нэрэл та̄мдэрлат чар му́ндэл ҷвэҷта̄рӷэт варга́, ӄо́рӷэт ва́ргэндэл понҗ Ме́ригаутэ Ауштралиянд ти̇̄рэшпа. Ме́нэрэл та̄мдэрэл ӄо́рӷ нэ кек ня́ӷэндо ня́нд пӧ̄шпа.

Та́ӄӄэл чи̇бэӷэт на́рка (чаӷ ӄорӷ) варга́, ня̄ӷула (та̄ӄӄэл ӄӯла) чаӷ ӄо́рӷэп ху́руҷэшпле варга́дэт.

Ӄо́рӷэт эл

Ӄорӷ маҗӧ́ӷэт варга́, кытӄэтпа́роӷэт ай кы́ӷэт ӧ̄дыт ӄвэлп кватку́т. По̄т ӄунд ӄорӷ кыба́ хуру́лап, ҷобо́рп аве́шпат. Оӄӄэрба́р ӄорӷ ӄӯт ма̄донд, по́рланд тӧ́ква - а́бэп твэ́лешпат. Ӄорӷ, ӄӯт таре́, му́ндэк а́бэп аве́шпат. Ундо́ ӄорӷ хуруҷэгунда́, оӄӄорни̇̄ таб ӄарт ху́руҷа. Най ӄорӷ ӄвэ́лҷле тӓну́а, кы́ӷэт ай Ӄолдо́ӷэт но́дып, нырша́п ай арӄ ӄвэ́лп ӄвадэ́шпэндат.

Ӄорӷ ӄӯт таре́ чек кура́лешпа, фаӈ хыӷылба́, ӄо́рӷэт тольҗь ка́уга э̄я. Ӄо́рӷнан чумб тар э̄я, ӄӯла ӄо́рӷэл та́рэутэ чурга́п, по́рӷэтӄо кавпи́п ме̄шпадэт.

Ӄо́рӷэҷэдэ

Ху́руҷэдэлӄӯт чат ӄорӷ - ха̄л орҳу́л, ларэшпэдэл ху́руп э̄я. Му́ндэк маҗӧ́рэдэл ӄу́ла ӄо́рӷэп ӄу́жанэм чвэда́лҗэкумбадэт, ӄо́рӷэп кватпэшпэнда́дэт. Ӄо́рӷэт чат кадэ́шпадэт: Ӄэт, шӧ́тӄыт ӄо́рӷэп аҳа́ ӄонҗэрна́л - таб та́шэнд уго́т ватто́утэ маннэмба́т.

Ӄу́ла ӄо́рӷэтӄо уго́т ӄунд маҗӧ́нд ӄӧшӄушпа́дэт. Ӄэт кы́ӷэт ай Чулу́м кы́ӷэт ӄу́ла ӄо́рӷэп фаӄ тӓну́ҳадэт, оӄӄэрфа́ӄ ӄо́рӷэтӄо хӓӈгэл маҗӧ́нд ӱ́поҗегва́дэт.